*** جنون عاشق ***
يا بنت الإيه يا أمورة
عشقتك ف البعاد صورة
وفكرة لذيذة مجنونة
أعيش وياها أسطورة
صحيح الفكرة وخداني
وساكنة كل وجداني
تخاطب قلبي وجنونه
بأنك أنت عنواني
رسمت بالحروف اسمك
ويمين الله وبقسملك
ما شوفت في الجمال مثلك
وزي ملاك كدا ف حسنك
شايلك جوه نن العين
وبين الضلوع ناقش صورتك
بحبك أيوه دا حقيقي
وعيونك دربي وطريقي
عشتك حلم طول العمر
امتى بس ألاقيكي
وييجي بكره بالفرحة
بتاج بيزين الطرحة
وملكة في عرشها سارحة
بتمسح دمعة البارحة
تقول يا أملي الوحيد
التلاقي مبقاش بعيد
زرعنا فينا نبت الخلود
من النهاردة أصبح وليد
هنسقيه المحبه والغرام
ويرعاه تملي الأهتمام
وبالعيون يبقى الكلام
وبدون حروف نزيد إنسجام
واللي كان فكرة وأحلام
بقي بالعزم حقيقة تمام
ف أوعى تفرط مرة في حلمك
وتقول دا خيال إيه هيهمك
اتعب واشقى عشان توصله
وربك عمره ما يخلف ظنك
**************************
بقلم / مصطفى كرم
تعليقات
إرسال تعليق